Commune nouvelle

Dè Begriff von èrè Commune nouvelle z Frankriich wörd für è reformiti Großgmaind bruucht, wo durch dè Zämmèschluß vo früèner selbschtändigè Gmaindè per Dekret im Johr 2010 uff d Wält chò isch. D Rächtsgrundlaag dõdefür isch im Artikel 21 vum Gsetz Nr. 2010-1563 vum 16. Dezembèr 2010 („Reform vo dè Gebiètskörperschaftè“) feschtglait worrè. Sèlli Vorgangswys isch gwäält worrè, um è Reform vo Gmaindè z realisyrè un macht dè Zämmèschluss vo Nõchbòrgmaindè èbbèso möglich wiè au vo ganzè Gmaindevobänd, wo sich zuè nèrè "Commune nouvelle" voänderè wenn. D Commune nouvelle löst d Communes associées ab, wo durch s Gsetz Marcellin vum 16. Juli 1971 gschaffè worrè sin. D Commune nouvelle hèt s Zyl, diè übberfälligi Gmaindsreform z Frankriich ändlich z realisyrè, nõchdèm s Konzèpt vu dè Vowaltungsgmeinschaftè (CdC) sèlli Reform nit ermöglicht hèt, u. a. well d CdC dè kommunale Vowaltungsuffwand nit reduzyrt hèt, sondern nur interkommunali Aaglegèheitè effiziènter greglèt hèt. Bi dè neue Großgmaindè isch es z. B. jetzt möglich, d Kommunalvowaltung z voschlankè, idèmm d Communes déléguées uffglöst wörrèd, d CdC bildèt immer è zuèsätzlichi Vowaltungseinheit.